2014թ-ի մայիսի 3-ին «Պետական Գործիչների Երիտասարդական Դպրոցի» հերթական դասերից մեկն էր, որը վարում էր Սեդա Վարդանյանը: Օրը շատ սովորական էր և չկար ոչ մի զգացողություն, որ շուտով տեղի են ունենալու բացառիկ իրադարձություններ: «ՊԳԵԴ-YSSF» ՀԿ նախագահ Գևորգ Մանուկյանն, ինչպես միշտ, նույնպես ներկա էր դասին և սովորականի նման, հետևում էր ուսումնական գործընթացին:

Դասի ընթացքում, երբ դասախոսը ներկայացնում էր ԲՐԵՆԴԻՆԳ և ԼԱՎՄԱՐՔՍ հասկացողությունները, հարմար պահը որսալով, մեր Դպրոցի ուսանողուհի Նարինե Մանուկյանը խոսք խնդրեց և ներկայացրեց իր անակնկալը՝ այն համադրելով օրվա դասի բովանդակության հետ: Նա իր հետ բերել էր ՊԳԵԴ-YSSF-ի լոգոն՝ իր կողմից ասեղնագործված և ներկայացրեց այդ նվեր-անակնկալը բոլորին:

PR-Marketing-ի դասախոս Սեդա Վարդանյանի հավաստմամբ, սա հանդիսանում է լավմարքսի լավագույն և դիպուկ դրսևորում, երբ անհատը կամ քաղաքացիները սիրելով որևէ կազմակերպություն կամ կոլեկտիվ, պատրաստ են իրենց անհատական միջոցները տրամադրել, սերն ու հարգանքն արտահայտել տարբեր ձևերով:

Հաճելի անակնկալից հուզված, դեռ նոր էին ուշքի եկել, երբ մեր լսարանի դուռը բացելով ներս մտավ բավականին կիրթ և համակրելի արտաքինով մի պատանի: Նա ներկայացավ որպես Վիտալի Գրիգորյան և ցանկացավ տեսնել «ՊԳԵԴ» ղեկավարին: Առանձնազրույցում պարզվեց, որ Վիտալին բավականին ուսյալ երիտասարդ է, ունի առաջադեմ գաղափարներ:

Զարմանալի զուգադիպությամբ, Վիտալին հանդիսանում է «Մխիթար Սեբաստացի» կրթահամալիրի ավագ դպրոցի վարժարանի սովորող, որտեղից իր ուսուցչական գործունեությունն է սկսել պարոն Մանուկյանը: Զրույցի ընթացքում պարզ դարձավ նաև, որ Վիտալին 2013թ․մասնակցել է տեղեկատվական տեխնոլոգիաների բնագավառում ՀՀ նախագահի ամենամյա մրցույթին և հաղթել՝ ճանաչվելով որպես լավագույն աշակերտ ՏՏ ոլորտում։

Հիմա նա ցանկանում է իր ուսումնառությունը ստանալ նաև «Պետական Գործիչների Երիտասարդական Դպրոցում», որի համար մենք միայն ուրախ ենք, պարտավորված և ինչ որ տեղ նաև հպարտ, որ մեզ նախընտրում են լավագույնները: