Պարույր Սևակի Հետ՝ Առանց Նրա...
Հունիսի 17....
Օրացույցի մեջ շատերի համար հերթական մի օր, բայց ոչ հասարակ ամսաթիվ Պետական Գործիչների Երիտասարդական Դպրոցի մշակույթի բաժնի շնորհաշատ երիտասարդների:Հունիսի 17-ին հայ ժողովուրդի նշանավոր բանաստեղծ ու մեծանուն սիրերգակ Պարույր Սևակի մահվան տարելիցն էր:
ՊԳԵԴ Հ/Կ-ի և Երևանի Օքրո Օքրոյանի անվան գրադարանի միջև ամիսներ առաջ սկսված համագործակցությունը, որ բազմաթիվ անգամներ տարբեր ձևաչափերում ներկայացրել ենք մեր համակիրներին ու մեր գործունեությամբ հետաքրքրված հայրենակիցներին, այս անգամ առիթ տվեց մեզ մեկ անգամ ևս հիշատակելու անզուգական վարպետին ու ապրելու շատերիս համար այնքան անհրաժեշտ զգացմունքային րոպեներ, որոնք, ավաղ, մեր օրերում գրեթե բացակայում են:
Մեր համատեղ ջանքերով ու երիտասարդների նվիրումի շնորհիվ հնարավոր եղավ կազմակերպել մեծ վարպետի հիշատակման ու մեծարման ցերեկույթ՝ հենց գրադարանում, մեր իսկ կազմակերպության ներսում գործող երիտասարդ ասմունքողների՝ Աննա Գարեգինյանի, Էլեն Խաչատրյանի, Մելինե Ղազարյանի, Անի Ղալաչյանի, Ջուլիետա Ադամյանի, Սիրանուշ Թորոսյանի, Նորա Հայրապետյանի և ցերեկույթին կամավոր միացած ՊԳԵԴ-ի մտերիմ ընկեր և կայացած ասմունքող Նարեկ Մարգարյանի միջոցով:
Գրական ցերեկույթին մասնակցում էին ժամանակակից գրողներ Լևոն Բլբուլյանը, Գագիկ Դավթյանը, Անահիտ Դանիելյանը, Ռեգինա Ամատունին և Վահե Այվազյանը: ՊԳԵԴ-ի ասմունքողները հնչեցրեցին և միջոցառմանը ներկա հեղինակների դատին հանձնեցին նաև նրանց ստեղծագործությունները:
Միջոցառումն անցավ բացառիկ հուզական միջավայրում, ուր թևածում էր սերը, նվիրումն ու վեհությունը: Մթնոլորտն ավելի էր շիկանում հատկապես հայրենասիրական երգերի խրոխտ հնչերանգներով, ինչը մեծ ուժ ու լիցքեր հաղորդեց ՊԳԵԴ-ականներին՝ առաջիկայում առավել ինտենսիվ դարձնելու մեր թիմի նվիրական ու կամավորական աշխատանքները՝ ի նպաստ հայ երիտասարդների, մեր սերունդների ու հասարակության:
Միջոցառման ավարտին Օ.Օքրոյան գրադարանի տնօրինուհի Սյուզաննա Կարապետյանն իր ինքնագրով Պետական Գործիչների Երիտասարդական Դպրոցի հիմնադիր-ղեկավար Գևորգ Մանուկյանին նվիրեց մի շարք արժեքավոր գրքեր՝ ՊԳԵԴ-ի գրադարանի համալրման նպատակով, իսկ մերօրյա գրողներն իրենց հիացմունքի խոսքերն ուղղեցին մեր կազմակերպության երիտասարդներին, ովքեր իրենց բազմազբաղ և հոգսառատ առօրյայում կարևորում են հոգևոր սնունդը, դեռ ավելին, կիսվում այդ արժեքով բոլորի հետ: