Տրամադրող մեկնարկը ողջունելի էր, բեղմնավոր ընթացքը՝ խոստումնալից, իսկ արդեն ավարտը՝ մեծագույն հաճույք:
Ահա և «ՊԳԵԴ»-ը պատվով իրականացրեց և հպարտությամբ վերջնագծին մոտեցրեց ուսումնական այս տարվա առաջին փուլը՝ «ՀՀ հարաբերությունները հարևան և ոչ հարևան երկրների հետ» առարկայի երկամսյա դասընթացը, որը դրոշմվեց և իր հետքը թողեց «ՊԳԵԴ»-ի շրջահայաց և նպատակասլաց ուսանողների գիտելիքների վրա:

Կայացած ընթացքի և հաջող ավարտի կապակցությամբ՝ շնորհավորանքի խոսքով հանդես եկավ «ՊԳԵԴ» ՀԿ-ի նախագահի պաշտոնակատար Զորիկ Հանիսյանը՝ նշելով, որ շատերը կարող են մեկնարկել նոր փուլ իրենց կյանքում, բայց քչերին է հաջողվում անցնել Ռուբիկոնն ու հասնել իրենց թիրախին: Ահա այս օրինաչափությամբ էլ բազում հայտերից ընտրված և հնարավորություն ստացած երիտասարդների մի մասին հաջողվեց արժանապատվորեն ու հաստատակամորեն ավարտել դասընթացը:

Դեկտեմբերի 13-ը ամբարված հույզերի և շնորհակալական խոսքերի հրավառություն էր «ՊԳԵԴ»-ում: Երբ ակնկալիքներդ արդարացված են, դրվատանքի խոսքերն անգամ քիչ են թվում: Ուսանողները կիսվեցին իրենց տպավորություններով, իրենց երախտագիտությունը , նոր փուլի սպասելիքները հայտնեցին: Իսկ աշխատակազմը արձանագրեց իր դիտարկումները, հղեց ջերմ շնորհավորանքներն ու իր մեծ շնորհակալական խոսքն ուղղեց «ՊԳԵԴ» ՀԿ-ի նախագահ Գևորգ Մանուկյանին՝ ոչ ֆորմալ կրթության ստացման նմանօրինակ հնարավորություն ընձեռելու համար :

Իրենց ակտիվությամբ, կանոնավոր ու պարտաճանաչ հաճախելիությամբ աչքի ընկած ուսանողները ստացան հավաստագրեր, իսկ մշտապես ակտիվ գործունեություն ծավալելու և հետաքրքիր նախաձեռնություններով հանդես գալու համար շնորհակալագրեր հանձնվեցին «ՊԳԵԴ»-ի աշխատակազմի անդամներից՝ Սեդա Գասպարյանին, Հասմիկ Պետրոսյանին, Էլեն Խաչատրյանին, և իհարկե, Մարգարիտա Գասպարյանին, ում ջանքերի շնորհիվ կազմակերպվեցին հետաքրքիր բանախոսություններ ու կառուցողական բանավեճեր: Եվ այդ եռանդի ու օպտիմալ գործունեության համար «ՊԳԵԴ»-ի տասը կրծքանշաններից երկրորդը շնորհվեց Մարգարիտա Գասպարյանին:
Ահա և վերջ... Գոհունակ ժպիտներով՝ սպասենք նոր փուլի հաջորդ ընթացքին...

«ՊԳԵԴ-YSSF» Հ/Կ տեղեկատվության և հասարակայնության հետ կապերի բաժին` Էլեն Խաչատրյան: