2014թ-ի հուլիսի 30-ին տեղի ունեցավ «ՊԳԵԴ-YSSF» Հ/Կ-Ի ամառային արտագնա հանդիպումներից հերթականը: Այս անգամ մեր «թիրախում» էր հայտնվել «Սպառողների միության» նախագահ Արմեն Պողոսյանը: Վերջինս, հայտնելով իր ուրախությունը՝ երիտասարդների հետ հանդիպման առթիվ, ցանկացավ զրույցը սկսել հետևյալ խոսքերով. «Աշխարհը կառուցված է ներդաշնակության վրա»….

Հանդիպումն, ինչպես միշտ, ընթացավ մեր ուսանողների կողմից ուղղված հաճախակի հարցերով, հագեցած էր քննարկումներով և հետաքրքրիր առաջարկներով: Խոսվեց արդի և կարևոր խնդիրների՝ սպառողների պաշտպանության, ինչպես նաև ապրանքների ունիֆիկացման և ստանդարտացման մասին: Պարոն Պողոսյանն անդրադարձավ «Չափաբանության միասնականության օրենք»-ին, նշեց նրա կարևորությունն ու կիրառման անհրաժեշտությունը: Տեղեկացրեց նաև ՄԱԿ-ի կողմից սպառողների պաշտպանության վերաբերյալ ընդունված չորս որոշումների մասին.

1. Ընտրելու իրավունք
2. Մատչելիության իրավունք
3. Լսված (տեղեկացված) լինելու իրավունք
4.Անվտանգ ծառայություններից և ապրանքներից օգտվելու իրավունք:

Պետ. Գործիչների համար հաճելի նորություն էր ՍՄԱ (Սպառողների Միջազգային Ասոցիացիա)-ի և նրա ծավալած գործունեության մասին տեղեկատվությունը: Ասոցիացիան ձգտում է պաշտպանել ոչ միայն հասարակության բոլոր խավերի իրավունքներն ու շահերը, այլև ուսուցանել, կրթել նրանց որպես սպառող: ՍՄԱ –ն գտնում է, որ յուրաքանչյուր սպառող պետք է տեղեկացված լինի իր հիմնական կարիքները բավարարելու , առողջ միջավայրի, անվտանգության, հավասարության, պաշտպանության, լրատվության, ընտրության և որպես սպառող՝ գիտելիքներ ստանալու իրավունքներից:

Այնուհետև մեր ուսանողների կողմից հնչեցին բազմաթիվ հարցեր, որոնց պրն. Պողոսյանը տվեց սպառիչ պատասխաններ: Որպես վերջաբան, պրն. Պողոսյանն հավելեց.
-Մեծերը սիրում են խորհուրդներ տալ երիտասարդներին. Լսե՛ք, սակայն առաջնորդվե՛ք միայն սեփական մտածողությամբ և ինչպես ժողովրդական խոսքն է ասում՝ «Սովորացրած խելքը մինչև դրսի դուռն է»: