Հուլիսի 22-ին Երևանի «Մոսկվա» կինոթատրոնում տեղի ունեցավ մեր իրականության ամենասկանդալային մտավորականի, միշտ յուրահատուկ ոճով ստեղծագործողի ու մի շարք պիեսների ( այդ թվում՝ «Խաթաբալադա», «MEA CULPA- Իմ մեղքը » ) հեղինակ, արձակագիր ու երգիծաբան, «Երիտասարդ Ոզնիներ» երգիծական թատրոնի հիմնադիր Վահրամ Սահակյանի նոր հրատարակված գրքերի՝ «Ես իմ անկյունից» բանաստեղծությունների և «Վարձու ինքնասպաններ» վեպի շնորհանդեսը:

«Պետական Գործիչների Երիտասարդական Դպրոց» հասարակական կազմակերպության ղեկավար կազմը՝ «Երիտասարդական կառավարություն» նախագծում ներգրավված մեր երիտ.նախարարների հետ միասին, մեծ սիրով մասնակցեցին այդ միջոցառմանը՝ հեղինակի նոր գրքերը նրա իսկ ինքնագրով ձեռք բերելու բացառիկ ակնկալիքով:

Վահրամ Սահակյանը, ինչպես միշտ, աչքի ընկավ իրեն հատուկ առատաձեռնությամբ և անկանխատեսելի հումորով շաղախված զրույցի ընթացքում մեր ձեռք բերած գրքերից բացի, նվիրեց ևս մի քանիսը՝ «ՊԳԵԴ» Հ/Կ-ի գրադարանին: Տեղեկանալով մեր Հ/Կ ծավալած գործունեության մասին, հեղինակը մեծ սիրով ընդունեց մեր հրավերը՝ մոտ ապագայում առանձին հանդիպել մեր երիտասարդների և ուսանողների հետ:

Ուզում ենք տեղեկացնել, որ «ՊԳԵԴ-YSSF» Հ/Կ-ն 2014թ սեպտեմբերից՝ նոր ուսումնական տարվա սկզբից, իր հարկի ներքո կձևավորի մշակութային և գեղագիտական կրթության ամբիոն, որի շնորհիվ մեր ուսանողներն ու երիտասարդները հետայսու առավել հաճախակի հնարավորություն կունենան հաղորդակցվել մտավորականների, մշակույթի և արվեստի գործիչների հետ:

Մենք միշտ փորձում ենք պահպանել լավագույնի մեր դիրքերը՝ առաջինների շարքում……