2013թ-ի նոյեմբերի 2-ին, «Պետական Գործիչների Դպրոց» ծրագրի շրջանակներում, մեր Կրթական-Քաղաքական Ծրագրերի Կենտրոնի բանախոսն էր ՀՀ Դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանը:

Դասախոսության թեման էր «Հայաստանի Հանրապետության դատարանակազմությունը»: Հյուրը, դասախոսության շրջանակներում, ներկայացրեց Հայաստանի դատարանների կառուցվածքը, գործառույթներն ըստ ատյանների, իրավասություններն ու պարտականությունները:

Ունկնդիրների հետաքրքրությունն այնքան մեծ էր թեմայի նկատմամբ, որ հարցերի շրջանակը դուրս եկավ դասախոսության հիմնական թեմայի շրջանակներից: Ի պատիվ բանախոսի հմտության ու փորձառության, նրան հաջողվեց հանդիպումը վարել ինտերակտիվ մեթոդներով, ունկնդիրներին մատչելի ու բազմաթիվ օրինակներով ներկայացրեց դատարանի առաքելությունն, արդարադատություն իրականացնելու բացառիկ իրավասության սահմաններն ու հիմնական կանոնները, պատասխանեց երիտասարդներին հուզող բազմաբնույթ ու բազմաթիվ հարցադրումների:

Դասխոսության ընթացքում խոսվեց նաև Սահմանադրական ու Մարդու իրավունքների եվրոպական դատարանների իրավասություններից, ներպետական դատական ատյանների ու եվրոպական դատարանի միջև գոյություն ունեցող ու միմյանց հաջորդող կապի մասին:

Դասախոսության ավարտին ունկնդիրները ցանկություն հայտնեցին շարունակել Հայաստանի իրավապահ ու դատական մարմինների մասին դասախոսությունները, այն դարձնելով իրավական գիտելիքների մատուցման առանձին խորագիր և առարկա, գիտակցելով, որ թե պետական գործիչների և թէ շարքային քաղաքացիների համար քննարկվող թեմաների տիրապետումը խիստ պարտադիր է և օգտակար:

Պարոն Բաբայանը մեծ սիրով ընդառաջեց «Պետական գործիչների» առաջարկին և խոստացավ առաջիկայում մշակել հատուկ դասախոսությունների շարք, որոնք կհամալրեն մեր ուսանողների թե գիտելիքները և թե հմտությունները:

Վերջում, առանց ավելորդ համեստության, ուզում ենք նշել, որ ՀՀ դատական դեպարտամենտի պաշտոնյան հատուկ ընդգծեց, որ արդեն երկրորդ անգամ է, որ մեծ սիրով գալիս է «Պետական գործիչների դպրոց», քանի որ իսկապես այստեղ մեկտեղված են խելացի երիտասարդներ, իսկ Կրթական Կենտրոնն էլ համալրված է բանիմաց երիտասարդներով, որի շնորհիվ ինքը միշտ պատրաստ է օգտակար լինել նրանց իր գիտելիքներով ու փորձով: