2015թ. Օգոստոսի 10-15 Ռիգայում տեղի ունեցավ ՆԱՏՕ Մոդել Երիտասարդական Համաժողովը, որին մասնակցում էին աշխարհի 50 պետությունները ներկայացնող շուրջ 150 երիտասարդներ և երիտասարդական կառույցների անդամներ: ՆԱՏՕ Մոդել Երիտասարդական Համաժողովի աշխատանքներն այս անգամ հնարավոր եղավ զուգահեռ անցկացնել նաև մեկ այլ քաղաքում` Ստոկհոլմում, ինչն առավել հիշարժան և հետաքրքրական դարձրեց մասնակիցների առօրյան:

Հիշեցնենք, որ ՆԱՏՕ Մոդել Երիտասարդակա համաժողովներն իրականացվում և ֆինանսավորվում են ՆԱՏՕ-ի կողմից, որն առաջին անգամ կազմակերպվել է 2012թ Բրյուսելում: Այս երեք տարիների ընթացքում այն կարողացել է իրականացնել բազում հանդիպումներ, համաժողովներ և կոնֆերանսներ, որոնց մասնակիցների թիվն արդեն գերազանցում է մի քանի հազարը, հասցրել է ճանաչվել որպես աշխարհի երիտասարդական հավաքներից ամենամեծ և ուսուցողական հարթակներից մեկը:

Վերջինս կրթում և ինքնադրսևորման միջազգային հնարավորություններ է ապահովում երիտասարդ քաղաքական-հասարակական գործիչներին, սկսնակ դիվանագետներին և առհասարակ աշխարհում տեղի ունեցող գործընթացներով հետաքրքրվող երիտասարդներին: Այս անգամ համաժողովի քննարկման առարկան ահաբեկչությունն էր և տեռորիզմի դեմ պայքարը, Կիբեր անվտանգությունը, ՄԱԿ-ի կողմից ընդունած No 1325 բանաձևը, ՆԱՏՕ-Աֆղանստան հարաբերությունները, շոշափվեցին նաև որոշ վիճահարույց հիմնահարցեր` գերտերությունների կողմից աշխարհի վերաբաժանման գործընթացների շուրջ:

Համաժողովում դասախոսություններով հանդես եկան Կանադայի Վանկուվերի համալսարանի պրոֆեսոր Ալեքսանդր Մունը, ՆԱՏՕ-ի ռազմական կոմիտեում Բելգիայի ներկայացուցիչ Կուրդ Էնգելենը և մի շարք բարձրաստիճան այլ մասնագետ-փորձագետներ:

Այս համաժողովին Հայաստանի պատվիրակության անդամներն էին Գառնիկ Դավթյանը` որպես պատվիրակության ղեկավար, Սամվել Ղարիբյանը և Սիրանուշ Ադամյանը: Ի պատիվ մեր հայ պատվիրակների և հատկապես Գառնիկ Դավթյանի ցուցաբերած արտառոց գիտելիքների ու հմտությունների, «YATA SPAIN» հիմնադիր Պեպե Վիլլենա Սիերան մեր պատվիրակության ղեկավարին հատուկ և պաշտոնական առաջարկությամբ հրավիրել է մասնակցելու նաև 2015թ սեպտեմբերին Իսպանիայում անցկացվելիք «Միջերկրական Երիտասարդական Երկխոսություն» հեղինակավոր համաժողովի աշխատանքներին` կոնֆերանսի վարողի (chairman) կարգավիճակով: Անխոս, նման ձեռքբերումը մեծ պատիվ է ՊԳԵԴ-YSSF Հ/Կ յուրաքանչյուր անդամի համար, հատկապես մեր կազմակերպության միջազգային հեղինակության ու ճանաչման առումով: Ուստի ՊԳԵԴ Հ/Կ ողջ անձնակազմը հայտնում է իր խորին շնորհակալությունը Գառնիկ Դավթյանին` իր մասնագիտական գիտելիքների փայլուն տիրապետման, մարդկային բացառիկ տեսակի և մեր կազմակերպության դրոշը միջազգային գրեթե բոլոր հարթակներում խրոխտ և հպարտ ծածանելու համար: