Ամառվա թեժ օրերին ՊԳԵԴ-YSSF հասարակական կազմակերպության առավել նախաձեռնող մի խումբ երիտասարդներ չեն դադարում իրենց ակտիվ հասարակական գործունեություն ծավալելու և նախաձեռնող կենսակերպից: Օրեր առաջ ՀՀ սպորտի և երիտասարդության հարցերի նախարարության ‹‹Երիտասարդական Ուսումնասիրությունների Ինստիտուտ›› ՊՈԱԿ-ում տեղի ունեցավ աշխույժ քննարկում` ՀՀ-ում ‹‹Երիտասարդական աշխատողի և երիտասարդական աշխատանքի մասին›› հետազոտության շրջանակներում:

Նշված խնդիրը ՀՀ-ում վաղուց է հասունացել, ներկայումս տեսանելի են դրա լուծման բազմաթիվ ճանապարհներ և մեթոդներ, որոնք իրականում կարող են առաջ քաշել հատկապես այն երիտասարդները և ոլորտում ակտիվ գործունեություն ծավալող կազմակերպությունները, ովքեր իրենց ամենօրյա աշխատանքներում հաճախ են բախվել տարրաբնույթ և արհեստական, երբեմն էլ նաև շատ օրինաչափ երևույթների հետ:

Հետազոտությունների և քննարկումների նպատակն է երիտասարդների համատեղ և համընդհանուր ուժերով հստակեցնել` ով է երիտասարդ աշխատողը և գործունեության որ տեսակն է համարվում երիտասարդական աշխատանք: Այնուհետև հավաքված ողջ տեղեկատվությունը, վերլուծություններն ու վիճակագրական տվյալները ամփոփ տեղեկանքով պետք է ներկայացվեն ՀՀ կառավարություն և համապատասխան գերատեսչություններ:

ՊԳԵԴ-YSSF ՀԿ-ում գործունեության արդեն բազմամյա փորձ ունեցող մի խումբ երիտասարդներ աշխատանքների համակարգմամբ զբաղվող փորձագետներին ներկայացրեցին իրենց տեսակետները, խնդրի առավել արդյունավետ լուծման համար առաջ քաշեցին իրենց տեսակետները, իրենց պատրաստակամությունը հայտնեցին առավել ակտիվ մասնակցություն ապահովել` հետագա ուսումնասիրությունների ընթացքում:

ՊԳԵԴ-YSSF Հ/Կ-ն իր շնորհակալությունն է հայտնում ‹‹Երիտասարդական Ուսումնասիրությունների Ինստիտուտ›› ՊՈԱԿ-ի ղեկավարությանն ու բարեխիղճ երիտասարդ աշխատողներին, ովքեր վստահում են մեր համագործակցության արդյունավետությանը, հավատացած են մեր գիտելիքների ուժին և վստահում են կամավորական աշխատանքներ ծավալելու մեր ներուժին: