Կյանքի ներկապնակի պայծառ գույների ազատ միաձուլում՝ փոխլրացված եթերային թեթևությամբ... Այս պատկերը մեկ բառով կոչվում է ՊԱՐ, որով պետք է ապրել, շնչել և վայելել այնպես, որ դիմացինը ճախրի քո իսկ ստեղծած վառ աշխարհում և լցվի անսահման ջերմությամբ և հոգևոր բավարարվածությամբ: Պարը միջոց է՝ ինքնաարտահայտվելու և հույզեր փոխանցելու: Այն ֆիզկուլտուրայից վերածվում է արվեստի, երբ հարմոնիկ են հոգին և մարմինը՝ առլեցուն մելոդիկ ներդաշնակությամբ:

Ահա հոգու սովը հագեցնելու համար այս անգամ մեր «ՊԳԵԴ»-ի ուսանողները հնարավորություն ունեին մասնակցելու պարի անվճար դասընթացների: Իսկ պարուսույցն էր «Հայաստանի պարի պետական անսամբլ»-ի պարող, «Real Dance» պարային համույթի ղեկավար Գոռ Մկրտչյանը: Շատ ջերմ և ընկերական մթնոլորտում սկսվեց հայկական, հունական, վրացական, ինչպես նաև լեզգիների ազգային պարերի ուսուցումը:

Մեր պարուսույցը յուրաքանչյուր պարի հմտությունները գաղտնազերծելուց առաջ պատմում էր՝ ինչ հետաքրքիր վարկածներ, պատմություններ կան՝ կապված տվյալ պարերի հետ: Սկզբում սովորեցինք մերը՝ հայկականը, «Վերվերի», «Քերծի» պարերի, «Արտաշատի», «Աշտարակի» պարային շարժումների, «Մանրուքիներ»-ի հիմնական տարրերը: Մեր ուսանողները, մեծ խանդավառությամբ և լավագույնին հասնելու համար ճիգերի գործադրմամբ, փորձում էին սերտել պարը:

Հաջորդը հունական ազգային պարի հերթն էր : Բոլորդ կասեք, որ հունական ազգային պարը հանրահայտ «Սիրտակի»-ն է, բայց, ինչպես և մենք, դուք ևս կսխալվեք, քանզի վերոնշյալ պարն իրականում հունական ֆիլմի համար էր հորինված եղել, իսկ հունական ազգային պարը «Հասապիկո»-ն է, որը և մեծ ջերմեռանդությամբ սովորեցինք մենք: Ինչպես նաև վրացական «Սվանուրի» պարը հասցրինք սերտել: Այնուհետ սահուն անցում կատարեցինք վրացական ազգային «Քալտա» պարին, ինչպես նաև բոլորիս կողմից շատ սպասված լեզգիների ազգային «Լեզգինկա» պարին:

Մեկ օրում այդքան տված և կրկնակի ստացած էներգիան, նոր գիտելիքները, բարձր տրամադրությունը անմոռանալի հուշ են բոլորիս համար: Թեկուզև մի փոքր չէր ստացվում այս կամ այն շարժումը, բայց դա սքողվում էր ոգևորվածության շղարշով ու դրական լիցքեր հաղորդում: «ՊԳԵԴ»-ը օժանդակում է մեր երիտասարդների գեղագիտական զարգացմանը ևս, իսկ այս օրինակելի նախաձեռնության համար, հիրավի, շնորհակալ ենք «ՊԳԵԴ»-ի «Մշակույթի և գեղագիտության» ամբիոնի ղեկավար Հասմիկ Պետրոսյանին՝ իր կազմակերպչական աշխատանքի համար:

«ՊԳԵԴ-YSSF» Հ/Կ տեղեկատվության և հասարակայնության հետ կապերի բաժին` Էլեն Խաչատրյան