Հայաստանում կոռուպցիայի դեմ համակարգված պայքարելու համար ոլորտում կարևոր են քաղաքացիական հասարակության կազմակերպությունների և զանգվածային լրատվության միջոցների ունեցած գիտելիքները: Եվրոմիության կողմից ֆինանսավորվող «Կոռուպցիայի դեմ պայքարի բազմակողմանի խթանում» ծրագրի շրջանակներում «Հայաստանի երիտասարդ իրավաբանների ասոցիացիան» և «Ինֆորմացիայի ազատության կենտրոնը» կազմակերպել էին եռօրյա հակակոռուպցիոն ուսուցում Երևանի քաղաքացիական հասարակության կազմակերպությունների և ԶԼՄ-ների համար:

«Կոռուպցիայի դեմ պայքարի բազմակողմանի խթանում» ծրագրի ղեկավար Կարեն Զադոյանի խոսքերով, այս հակակոռուպցիոն ուսուցումներն իրականացվում են ամբողջ Հայաստանով: Սա թվով 9-րդ հակակոռուպցիոն ուսուցումն էր և 5-րդը՝ Երևանում: Յուրաքանչյուր ուսուցման մասնակցում են միջինը 10-ը հասարակական կազմակերպությունների և ԶԼՄ-ների ներկայացուցիչներ:

ՊԳԵԴ- YSSF Հ/Կ-ն, ի թիվս մյուս կազմակերպությունների, ևս ներկայացված էր նշված ծրագրին՝ Դպրոցի «Պետության և իրավունքի ամբիոնի» ղեկավար Առնոլդ Վարդանյանի մասնակցությամբ:

Առաջիկայում հանրությանը կներկայացվի Հայաստանի 2014-2018թթ. հակակոռուպցիոն ռազմավարության վերջնական նախագիծը: Հանրային կառավարման համակարգում կոռուպցիայի դեմ պայքարի հայեցակարգով նախատեսվել է Հայաստանում հակակոռուպցիոն բարեփոխումների համակարգումն ու դրանց կատարման նկատմամբ հսկողությունը վերապահել Կոռուպցիայի դեմ պայքարի խորհուրդին, դրա կազմում ընդամենը 2 տեղ հատկացնելով ՔՀԿ-ների ներկայացուցիչներին: Սեմինարին մասնակցող հասարակական կազմակերպությունների գրեթե բոլոր ներկայացուցիչների կարծիքով հասարակության շահերը ներկայացնելու համար 2 ՀԿ-ի ներկայացուցիչը քիչ է և առաջարկում էին վերանայել նշված քվոտան՝ այն հասցնելով մինչև 5-ի:

Եռօրյա ուսուցման օրակարգում լավ/բարեխիղճ կառավարման սկզբունքներն են, կոռուպցիա հասկացությունը, զարգացման պատմությունը, առաջացման պատճառները, ոլորտում մոնիթորինգներ իրականացնելու ձևերը և այլն: Ուսուցումը հաջողությամբ ավարտած ՔՀԿ-ները և ԶԼՄ-ները հնարավորություն կունենան մասնակցել հանրային վերահսկողության արդյունավետության բարձրացման և համապատասխան մոնիթորինգային, վերահսկողական և հետաքննական ծրագրերի իրականացման նպատակով տրամադրվող դրամաշնորհների մրցույթին:

ՊԳԵԴ- YSSF Հ/Կ-ն իր խորին շնորհակալությունն է հայտնում ծրագրի կազմակերպիչներին և մեր ամբիոնի ղեկավար Առնոլդ Վարդանյանին՝ ակտիվ և կառուցողական մասնակցության, ինչպես նաև մեր Կազմակերպության բարի համբավը բարձր պահելու համար: