2014թ-ի մարտի 29-ը երկար է հիշվելու «Պետական Գործիչների Դպրոցի» տարեգրության մեջ: Այդ օրը բացառիկ փորձություն անցան մեր ուսանողները՝ դասի գալուց առաջ հանդիպելով սաստիկ կարկուտին և հայ իրականության մեջ գարնանային առատ ձյան տեղումներին: Չնայած այդ ամենը չկարողացան ետ պահել մեր ուսանողներին գիտելիքից, ինտելեկտից և միմյանց հանդիպելու մեծագույն ցանկությունից:

Այդ բացառիկ եղանակային պայմաններում մեր Դպրոցում առաջին անգամ սկսվեց դասավանդվել «Մարքեթինգ, PR և գովազդ» գործնական դասընթացը: Այն իրականացնում է Պետական Գործիչների Դպրոցի աշխատակազմի ղեկավար, “Global Media Lab” ընկերության հիմնադիր Սեդա Վարդանյանը:

Դասընթացը բաղկացած է լինելու 3 մասից: Ուսանողներին ամփոփ ծրագիրը ներկայացնելուց հետո, դասավանդողը հայտնեց, որ ուսանողները մարքեթինգի, PR-ի և գովազդի գործիքներին ու կանոններին տիրապետելուց բացի, պետք է ներկայացնեն նաև սեփական նախագծերը՝ “WOW-PROJECT”-ները: Ուսանողերն իրենց սեփական մարքեթինգ-բրենդինգը և առաջխաղացումը կազմակերպելու են հենց այդ գիտելիքների շնորհիվ: Դասընթացի ավարտին ուսանողները պետք է ներկայացնեն 17 wow-project-ների պրեզենտացիաները, որոնցից և հաղթող կճանաչվեն 3 թիմեր՝ իրենց նախագծերով:

Այդ օրվա հիմնական դասընթացը վերաբերվում էր Մարքեթինգի անփոփոխ 22 կանոններին , որոնք հիմնված էին Ջեկ Տրաուտի և Էլ Ռայսի 25 տարվա պրակտիկայի և ուսումնասիրություների վրա: Ակտիվ քննարկվեցին բոլոր 22 օրենքները և միջազգային փորձի համաձայն պարզ դարձավ, որ եթե խախտվի թեկուզ մեկ օրենք, ապա բիզնեսում հաջողության հնարավոր է հասնել միայն մեծ դժվարությամբ: Իսկ հաջողությունը դա լավագույն վրեժխնդրության ձևն է: