Մայիսյան եռատոնին ընդառաջ, Եռաբլուր պանթեոն այցելության նախաշեմին, ՊԳԵԴ-YSSF Հ/Կ ուսանողները նախ այցելեցին Արցախյան Հերոսամարտում նահատակված, Շուշիի ազատագրմանը գործուն մասնակցություն ցուցաբերած, ԼՂ բանակի հիմնադիրներից, ԼՂՀ ‹‹Մարտական խաչ›› 1-ին աստիճանի շքանշանի ասպետ, զոհված ազատամարտիկ Վարդան Ստեփանյանի (Դուշման Վարդան) տուն-թանգարան, արժանացան հերոսի մոր՝ տիկին Զարիկի ջերմ ընդունելությանը:

Կրթական Կենտրոնն իր հիմնադրման օրվանից իսկ բացառիկ ուշադրություն և տեղ է հատկացրել հատկապես հայ երիտասարդի հոգևոր կրթությանն ու հայրենասիրության վեհ գաղափարներին, անձնազոհությանն ու մայր հողի հանդեպ յուրաքանչյուրիս սուրբ պարտականությունների անթերի իրագործման կարևորությանը: Դրա մասին են վկայում Կենտրոնում կազմակերպված մի շարք միջոցառումներ և այցելություններ, դասախոսություններ և հանդիպումներ տվյալ ոլորտի անմիջական մասնակիցների և գործիչների հետ:

Այս տարի մեր Կենտրոնի սաներն որոշեցին հայ ժողովրդի մայիսյան երեք հերոսամարտերում տարած հաղթանակների առաջին տոնը նշել հենց հերոսի տանը, ջերմ ու անկաշկանդ մթնոլորտում, լրացնելով նրա որոշ ընկերների և մեր հայրենակիցներից շատերի հարգելի բացակայությունը, սփոփել նրա մայրիկին և մեկ անգամ ևս խոնարհվել նրա առաջ, ամրապնդելով այն համոզումը, որ Վարդանի ու Եռաբլուրում հանգչող տղաներից և ոչ մեկի նահատակությունը անտեղի չի եղել, երբեք չի կարող մոռացված լինել կամ անտեսված:

Անչափ ուրախ ենք, որ տիկին Զարիկը մեր մեջ տեսավ Վարդանի ընկերներին կամ գուցե նաև նրա զավակներին ու մտերիմներին, հաճախ ուրախացավ, երբեմն տխրեց, բայց միշտ հպարտ մնաց՝ հերոսի մոր և համեստ հայուհու իր տեսակի մեջ:

Ազատամարտիկի մայրը սիրով մեր Դպրոցի գրադարանին նվիրեց որդու հերոսական կյանքի պատմությանը նվիրված գիրքը՝ իր բարեմաղթանքներով և օրհնանքի խոսքերով:

Երբեմն ուշադրության և գնահատումի մի ակնթարթից է նաև պայմանավորված, որպեսզի զավակ կորցրած ծնողը համակերպվի այն մտքի հետ ու շարունակի ապրել այն իրականության մեջ, որ իր որդու մահվան շնորհիվ ու գնով այլոք հնարավորություն ունեն այսօր բարեկեցիկ դարձնել իրենց կյանքն ու կենցաղը, հաճախ չնկատելով այդ ամենն իրապես ապահոված և դրա համար շատ թանկ վճարած տղաներին ու նրանց ընտանիքներին:

Փառք ձեզ, ազատամարտիկներ, հավերժ խոնարհում և մեծարանք ձեր ծնողներին: