2012թ. փետրվարի 25-ին, Զորավար Անդրանիկի ծննդյան 147 ամյակի և «Խնուս» մշակութային հիմնադրամի ստեղծման տարեդարձի առիթով, մեր Կրթական-Քաղաքական Ծրագրերի կենտրոնը կազմակերպել էր «Եդեմի Պարտեզ» պատմափաստավավերագրական ֆիլմի դիտում և դասախոսություն: Ֆիլմը Արևմտյան Հայաստանի Խնուս գավառի մասին էր:

Ուշագրավ դասախոսությամբ և իր նախնիների հետ կապված դիպվածների մասին խոսեց Երևանի Խ.Աբովյանի անվան Հայկական Պետական Մանկավարժական Համալսարանի կենսաբանության, քիմիայի և աշխարհագրության ֆակուլտետի դեկանի տեղակալ, աշխարհագրական գիտությունների թեկնածու, բազմաթիվ գիտական հոդվածների և մեկ տասնյակ բուհական դասագրքերի հեղինակ Յուրա Մուրադյանը:

Պատմափաստագրական դասախոսությամբ մեր Դպրոցի ուսանողների առջև հանդես եկավ նաև «Խնուս» մշակութային հիմնադրամի հոգաբարձուների խորհրդի նախագահ, Երևանի Պետական Համալսարանի պատմության ֆակուլտետի դեկան, պատմական գիտությունների դոկտոր-պրոֆեսոր Էդիկ Մինասյանը: Ֆիլմի ցուցադրությունից հետո ներկաները լսեցին «Եդեմի Պարտեզ» ֆիլմի հեղինակ, «Խնուս» մշակութային հիմնադրամի տնօրեն Սամվել Մկրտչյանին: